Wesley Sneijder, holandezi që ka luajtur me klube të mëdha si Real Madrid dhe Inter, rrëfen në librin autobiografik problemet që ka pasur gjatë eksperiencës së tij në Spanjë. Fama i ka sjellë pasoja mesfushorit, i cili nisi të konsumonte alkool ndjeshëm.
“Isha i ri dhe më pëlqente suksesi dhe të isha në qendër të vëmendjes, por gjëra të këqija ndodhën atje. Nuk ishin ilaçet, por alkooli”, tregon fillimisht Wesley, ndërkohë që vijon rrëfimin e tij. “Jam mësuar të jetoj si një yll. Adhurohesh si lojtar i Real Madrid dhe del në rrugë dhe shpenzon mijëra euro, madje dhe duke paguar gjëra për njerëzit.
Nuk privohesha nga asgjë. Unë mund të qëndroja vetëm dhe nuk e kuptoja që shishja e vodkës ishte bërë shoku më i mirë. Fizikisht nuk e kuptoja. Zgjohesha ditën tjetër sikur asgjë të mos kishte ndodhur”, shton holandezi.
Më pas ai pranon se gjërat nisën të ndryshonin dhe po i ndjente pasojat e konsumimit të alkoolit: “Vazhdova stërvitjen, por çdo herë isha më pak i përqendruar. Gënjeja veten duke thënë se gjithçka po shkonte mirë. Rashë fizikisht, vrapoja më pak dhe i fshihesha trajnerin. Mendoja se askush nuk do ta vinte re”. /abcnews.al
