Një incident ka ndodhur pasditen e sotme në Mitrovicë, tek Ura e Ibrit. Mediat në Kosovë raportojnë se një grup maturantësh serbë kanë shkuar pa paralajmërim në këtë anë të Mitrovicës dhe kanë hedhur fishekzjarrë në drejtim të zyrtarëve policorë.
Nga Policia e Kosovës kanë deklaruar se nga ky incident nuk raportohet për të lënduar.
“Një grup maturantësh afro 30-40 persona kanë shkuar tek Ura e Ibrit pa paralajmërim dhe kanë hedhur fishekzjarrë. Nuk raportohet për persona të lënduar, turma është shpërndarë nga policia. Do të shqiptohen masa kundërvajtëse”, ka thënë zëdhënësi i policisë Besim Hoti.
Në pamjet e publikuara në rrjetet sociale shihet se maturantët kanë mbajtur me vete edhe flamujt serbë.
