Bërja e detyrueshme e mbajtjes së maskave edhe në ambientet e jashtme, është një vendim i duhur, për të shpëtuar jetë. Kështu është shprehur epidemiologu Alban Ylli në një intervistë me gazetarin Endri Xhafo në Abc News.
Sipas asaj që tha Ylli gjatë bisedës në studio, virusi duket se është po aq agresiv sa ka qenë, gjë që nuk është e njëjtë në vendet e Evropës Perëndimore. Megjithatë, kjo sipas tij, ka të bëjë më shumë se faktorë të tjerë epidemiologjikë siç janë masat kufizuese të vendosura.
I pyetur nëse qeveria gaboi në fillim të pandemisë kur minoi rëndësinë e maskave, epidemiologu u shpreh se në deklaratat e bëra në pranverë ndikuan dy faktorë.
“…Në fillim të pandemisë e deri për 1 muaj më vonë, mesazhi mbi maskat mund të ketë qenë pak kontradiktor. Arsyeja e parë është e lidhur me një farë besimi se një mesazh i tillë do të ruante stokun e maskave për ata që kishin nevojë më tepër. Dhe arsyeja e dytë është evidenca.”
Sipas tij, evidencat që kishim në fillim të pandemisë nuk mund të krahasohen me ato që kemi aktualisht. Po ashtu, Ylli argumentoi që në fillim të pandemisë kishim të bënim me një kontekst tjetër, aso kohe, një rëndësi e madhe iu kushtua shtetrrethimit dhe distancimit social. Dhe në këto kushte, shton ai, roli i maskës bie disi.
” Kishim theks tek distancimi social, tek shtetrrethimi, në ato kushte maska bëhej më pak e rëndësishme, në terma të parandalimit. Unë kam thënë, ti përdorim si një mjet alturist. Sot them se duhet të japim mesazhe më të qarta. nuk mund t’i kthehemi lockdown-it. Janë të paktë në botë, shkencëtarët që janë kundër maskave. Çështja e maskave ka një konsesus më të gjerë se shtetrrethimi dhe distancimi social.”
Duke mbështetur edhe një herë masat e reja të prezantuara nga qeveria, Ylli tha se “absurd” mund të duket edhe ligji për vendosjen e rripit të sigurimit gjatë udhëtimit në automjet, por, sipas tij, duhet ta vënë rripin 500 persona që të shpëtohet një. E njëjta gjë, sipas tij, është e vërtetë edhe për maskat.
“Ndezja e dritave të makinës është shumë më pak e rëndësishme për shtetin sesa vendosja e maskës. 500 persona të vendosin maskën çdo ditë, sa herë nuk mund të mbahet distancimi social që të shpëtojnë një jetë.”
Ndërsa, i pyetur nëse mbajtja e maskës do të jetë e detyrueshme edhe gjatë bërjes së aktiviteteteve sportive, epidemiologu u shpreh se beson që komiteti i ekspertëve duhet të jetë duke hartuar disa përjashtime.
“..Komiteti po punon mbi disa detaje, mbi përmasa ndëshkimesh edhe me përjashtimet. Besoj që disa përjashtime duhen bërë.Fëmijët e vegjël nuk kanë arsye pse të mbajnë maska. Maska në kushte pune mund të jenë të rrezikshme, mund ta kapë një makineri. Tek persona me probleme serioze të frymëmarrjes. Persona në moshë të shtyrë, persona që kryejnë aktivitet të rëndë fizik. Apo ku ka lagështirë të madhe. Duhet të pranojmë se ndërhyrjet e vendosura shpëtojnë jetë.” s.b/abcnews.al/
