Këshilli i Ministrave të Italisë ka miratuar marrëveshjen me Shqipërinë për emigrantët që u firmos nga kryeministrat Meloni dhe Rama për emigrantët.
“Palazzo Chigi në fakt ka dhënë miratimin e tij për projektligjin që ratifikon marrëveshjen e lidhur mes liderëve të dy vendeve. Protokolli i prezantuar nga dy krerët e qeverive, Giorgia Meloni dhe Edi Rama, parashikon krijimin e strukturave në Shqipëri për të mirëpritur emigrantët që kanë zbarkuar në brigjet tona. Projektligji përcakton mbulimin financiar dhe rregullat e para të zbatimit të planit”, shkruajnë mediat italiane.
Ndërkohë ministri i Jashtëm Antonio Tajani tha se kostot e marrëveshjes janë më pak se 200 milionë euro dhe fondet do të shpenzohen për të luftuar emigracionin e paligjshëm.
“Kostot vjetore të marrëveshjes janë më pak se 200 milionë dhe do të shpenzohen mirë për të përballuar luftën kundër emigracionit të paligjshëm”, tha Tajani.
/abcnews.al/
