Mediat greke raportojnë se kjo do të jetë jave vendimtare përsa i përket bisedimeve mes Athinës dhe Shkupit për zgjidhjen përfundimtare të çështjes së emrit të Maqedonisë. Sipas të përditshmes Ekathimerini, po diskutohet për një traktat ndërkombëtar, që siguron anëtarësimin e Shkupit në NATO, vetëm pas disa korrigjimeve në Kushtetutën maqedonase.
Një diplomaci në lëvizje është cilësuar kjo javë nga mediat greke për sa i përket bisedimeve mes Athinës dhe Shkupit për çështjen e emrit të Maqedonisë, në kërkim të një zgjidhjeje të shpejtë dhe përfundimtare. Ekathimerini shkruan se bisedimet kanë vijuar në takimin e radhës mes ministrit të Jashtëm grek Kotzias dhe homologut të tij maqedonas Dimitrov fundjavën e kaluar. Negociatat po vijojnë mbi tre dokumente: një nga secili ministër dhe i treti nga zyra ndërmjetësuese e Kombeve të Bashkuara.
Sipas burimeve të së përditshmes grek, diplomatët po diskutojnë rreth mundësisë së një traktati ndërkombëtar që parashikon anëtarësimin e Shkupit në NATO, kur vendi të ndryshojë pika të caktuara në Kushtetutën e tij. Traktati më pas do të duhej të ratifikohej në parlamentin grek dhe atë maqedonas.
Qëllimi është që të shënohet një progres i atillë në mënyrë që kryeministri grek Tsipras dhe ai maqedonas Zaev të diskutojnë për çështjen para samititi të Be-së dhe vendeve të Ballkanit Perëndimor që do të mbahet në Sofie të enjten.
Të dyja palët kanë arritur marrëveshje në disa çështje të lehta politike duke premtuar se do të bashkëpunojnë në fushën ekonomike, atë të edukimit dhe kulturës.
Presioni ndërkombëtar për gjetjen e një zgjidhjeje sa më shpejt vazhdon. Për këtë arsye para një muaji kur komisioneri europian për zgjerimin Johanes Hahn u shpreh se cështja do të zgjidhej për dy javë, ministri i Jashtëm grek e cilësoi deklaratën si të pavend dhe i kërkoi që të mos sabotonte negociatat mes palëve./abcnews.al
