Marrëveshja midis qeverive të Greqisë dhe Maqedonisë për ndryshimin e emrit të ish-Republikës Jugosllave ka hyrë në procedurë parlamentare dhe Shkupi pritet ta ratifikojë para samitit të Bashkimit Evropian të fundit të Qershorit.
Parlamenti i Maqedonisë i dha sot dritën jeshile draftit të qeverisë për ratifikimin e marrëveshjes, ndërsa komisionet përkatëse të parlamentit hapën debate për këtë marrëveshje. Ministri i Jashtëm maqedonas, Nikolla Dimitrov, duke folur para ligjvënësve tha se marrëveshja është jetike për të ardhmen evropiane të Maqedonisë dhe se kjo varet nga ratifikimi i marrëveshjes.
Por opozita e cilësoi marrëveshjen si një akt kapitullimi dhe u largua nga seanca e parlamentit. VMRO-DPMNE thotë se marrëveshja për ndryshimin e emrit do të thotë një “embargo e plotë ndaj gjithçkaje që është maqedonase”./abcnews.al
