Macron thirrje komunitetit ndërkombëtar: Të mos tregojmë asnjë dobësi përballë Rusisë

Presidenti francez Emmanuel Macron i bëri sot thirrje komunitetit ndërkombëtar që të mos tregojë asnjë dobësi dhe asnjë frymë kompromisi ndaj Rusisë, ndërsa lufta në Ukrainë hyn nesër në muajin e saj të shtatë.

“Ne nuk mund të tregojmë asnjë dobësi, asnjë frymë kompromisi, sepse ka të bëjë me lirinë e të gjithëve ne dhe paqen në të gjitha anët e planetit”, deklaroi ai në një videomesazh në samitin “Platforma e Krimesë”, në të cilin marrin pjesë shtetet që mbështesin Ukrainën.

Emmanuel Macron ftoi edhe një herë Rusinë “të pushojë armiqësitë, të tërheqë trupat e saj nga i gjithë territori ukrainas dhe të zgjedhë diplomacinë për të rivendosur paqen”.

Evropianët janë të gatshëm të mbështesin betejën e Ukrainës përgjithmonë, tha presidenti francez duke iu drejtuar presidentit Volodymyr Zelensky.

“Franca dhe Bashkimi Evropian, së bashku me shumë aleatë dhe miq të Ukrainës, po bëjnë atë që është e nevojshme për të mbështetur luftën tuaj”, tha ai.

“Vendosmëria jonë nuk ka ndryshuar dhe ne jemi të gatshëm ta ruajmë këtë përpjekje përgjithmonë”, theksoi Emmanuel Macron. /abcnews.al