Liderët e Britanisë së Madhe, Francës dhe Gjermanisë kanë lëshuar këtë të hënë një deklaratë të përbashkët në të cilën kanë kërkuar vazhdimin e negociatave për armëpushimin në Gaza, duke theksuar se nuk mund të ketë më vonesa.
Lëvizja militante palestineze Hamas njoftoi më parë se çdo vazhdim i negociatave duhet të bazohet në planet e mëparshme dhe jo në një raund të ri negociatash, duke iu përgjigjur thirrjes së ndërmjetësuesve ndërkombëtarë për të mbajtur një takim të palëve ndërluftuese më 15 gusht, raporton BBC.
Ndërmjetësuesit nga Katari, Egjipti dhe SHBA-ja ftuan Izraelin dhe Hamasin në një takim të ri javën e kaluar dhe pala izraelite tha se do të dërgonte një ekip negociatorësh.
Kryeministri britanik Keir Starmer, presidenti francez Emmanuel Macron dhe kancelari gjerman Olaf Scholz përsëritën sot thirrjen e ndërmjetësit për vazhdimin e negociatave.
“Ne kemi punuar me të gjithë aktorët për të parandaluar përshkallëzimin dhe nuk do të kursejmë asnjë përpjekje për të ulur tensionet dhe për të gjetur një rrugë drejt stabilitetit”, thanë ata në një deklaratë të përbashkët.
Hamasi iu përgjigj presionit të ndërmjetësit duke bërë thirrje për një plan të bazuar në “vizionin” e presidentit amerikan Joe Biden nga maji, duke rënë dakord në parim për të vazhduar negociatat nga ku i lanë, në vend të ndonjë nisme të re.
“Ndërmjetësuesit duhet t’ia imponojnë këtë Izraelit pushtues dhe të mos kërkojnë propozime dhe negociata të reja që do t’i jepnin mbulesë agresionit okupues dhe më shumë kohë për të vazhduar gjenocidin e tij kundër popullit tonë”, tha Hamasi në një deklaratë.
Burimet i thanë BBC-së se pikat e diskutueshme janë futja e kushteve të reja izraelite që kërkojnë që palestinezët e zhvendosur duhet të kontrollohen pas kthimit në veri të Gazës, si dhe çështja e kontrollit të korridorit të Filadelfisë që kufizohet me Egjiptin./abcnews.al
