Mesfushori i Milanit, Ismael Bennarcer, ka vlerësuar maksimalisht shokun e tij të skuadrës, Zlatan Ibrahimovic. Në një intervistë për “AFP”, lojtari tregon se si suedezi po frymëzon kuqezinjtë këtë sezon dhe është bërë një lider për ta.
“Ibrahimovic jep shumë për ekipin dhe me përvojën që ka përpiqet të bëjë maksimumin. Edhe nëse e shikojmë ndonjëherë duke bërtitur në fushë nuk është problem për ne, pasi është më mirë sesa kur nuk thotë asgjë.
Atëherë do të thotë se atij nuk i intereson se çfarë po bën ekipi në fushë. Zlatan na jep shumë këshilla dhe është absolutisht një frymëzues e lider për lojtarët e rinj”, deklaron algjeriani.
Në fund 23-vjeçari ndalet dhe tek ecuaria e ekipit, si dhe deklaron se ata duhet të fitojnë patjetër një trofe në fund të sezonit. “Nëse nuk arrijmë diçka këtë vit, atëherë gjithçka që kemi bërë më parë nga marsi e deri më tani do të harrohet shumë shpejt.
Ne duhet të përpiqemi ta rikthejmë Milanin në vendin ku i takon. Është e mërzitshme për tifozët dhe për ne që po luhet ende me dyer të mbyllura. Ata nuk janë fizikisht në stadium, por na ndjekin dhe ne duhet të bëjmë maksimumin për ta”, përfundon Bennacer. /abcnews.al
