Banorët e Derna, në Libinë lindore, protestuan sot për të kërkuar përgjegjësi nga autoritetet pasi përmbytjet vdekjeprurëse shkatërruan qytetin, sipas korrespondentëve të AFP.
Qindra banorë u mblodhën jashtë Xhamisë së Madhe të qytetit dhe protestuan me parulla kundër autoriteteve të Libisë lindore, parlamentit dhe presidentit të saj, Aguila Saleh. “Populli kërkon rënien e parlamentit”, “Aguila është armiku i Zotit” dhe “Gjaku i dëshmorëve nuk u derdh kot” por edhe “Ata që vodhën apo tradhtuan duhet të varen”, ishin disa nga këto slogane.
Në një deklaratë të lexuar në demonstratë “në emër të banorëve të Dernës” kërkohej një hetim i shpejtë dhe “përgjegjësit e shkatërrimit” të sillen para drejtësisë. Gjithashtu, banorët kërkuan që të funksionojë “një zyrë mbështetëse e OKB-së në Derna” dhe të nisë procesi i rindërtimit të qytetit, si dhe të jepen dëmshpërblime për të prekurit.
Njerëzit kërkuan shpërbërjen e këshillit të qytetit dhe një hetim mbi buxhetet e kaluara të qytetit.
“Të mbijetuarit, në atë që ka mbetur nga qyteti, po kthehen kundër atyre që mbollën vdekje dhe shkatërrim,” shkroi analisti libian Anas el Gomati në Platformën X, duke komentuar fotot nga demonstrata.
Sipas politikanëve dhe analistëve, për shkak të kaosit që ka mbizotëruar në Libi vitet e fundit, mirëmbajtja e infrastrukturës jetike, siç është diga e Dernës, e cila u shemb dhe përmbyti qytetin më 10 shtator, ka rënë në plan të dytë.
Që nga përmbysja e Muammar Gaddafit në 2011, Libia është qeverisur nga dy qeveri rivale: një në Tripoli (e njohur nga OKB) nën kryeministrin Abdelhamid Dbeiba dhe një në lindje, ku është vendosur parlamenti, nën udhëheqjen e Marshalli i fuqishëm Khalifa Haftar. Në vitin 2018, forcat e Haftarit pushtuan Dernën, e cila në atë kohë ishte një bastion i islamistëve ekstremistë.
Demonstrata erdhi ndërsa ekipet e shpëtimit vazhdojnë të kërkojnë për mijëra njerëz të zhdukur nga përmbytja, të cilët besohet të jenë të vdekur.
Më herët sot, OKB-ja njoftoi se agjencitë e saj, veçanërisht Organizata Botërore e Shëndetësisë, po luftojnë për të parandaluar përhapjen e sëmundjeve dhe për të parandaluar një “krizë të dytë katastrofike në rajon”, duke paralajmëruar se ekziston rreziku për shkak të ujit të kontaminuar dhe mungesës së higjienës. “Për sigurinë tuaj, është e ndaluar të përdoret ose të pihet uji i rrjetit lokal të furnizimit me ujë, sepse është i kontaminuar”, tha Qendra Libiane për Kontrollin e Sëmundjeve.
