Në qytetin e Lezhës është shumë e vështirë të lëvizësh edhe pse akoma nuk ka nisur sezoni veror. Kjo për shumë arsye. ABC News foli me banorë, autoritet e policisë dhe të bashkisë.
Makina e policisë qëndron dysh edhe pse nuk ka ngjarje. Kurse kjo autoambulancë e parkuar keq ka bllokuar trafikun. Qarkullimi në Lezhë nuk është diçka e lehtë. Ata që nuk e njohin këtë qytet mbesin në trafik ose pa parkim. Tendenca për t’u grumbulluar në qendër e ka kthyer qytetin të paqarkullueshme.
Banorët kërkojnë që policia të jetë prezente. Thonë se kaosi po ua merr frymën çdo ditë. Në brendësi të lagjeve, situata është akoma më e rëndë. Trotuarët zaptohen nga makinat, kurse qytetarët lëvizin në rrugë.
Për shefin e Policisë Rrugore, Adriatik Huti, problem me qarkullimin ndodh për shumë arsye. Që nga rrugët dhe kryqëzimet e papërshtatshme, sinjalistika dhe deri tek mungesa e punonjësve të Policisë Rrugore.
Autoritetet e bashkisë u bëjnë thirrje drejtuesve se në periferi, jo më shumë se 500 metra larg qendrës ka vend për parkim. Në sezonin veror, numri i mjeteve në Lezhë trefishohet, e kjo do të thotë më shumë probleme nëse nuk zgjidhen, ato që ngrihen nga qytetarët dhe vete institucionet./abcnews.al
