Në ditën e dytë të Konferencës Kombëtare për Antikorrupsionin, kreu i Kadastrës Shqiptare, Artan Lame, ka treguar se niveli i korrupsionit në institucionin që ai drejton ka rënë. Lame, theksoi ndër të tjera se korrupsioni vjen për shkak të sistemit, që sipas tij duhet ndryshuar dhe se nuk është vetë çështje individësh.
“Jemi nga ato institucione që kemi hequr pafund nga puna. Nuk më keni parë asnjëherë në televizion të dal. Nuk është cështje njerëzish por sistemi. Në themel dy janë format e korrupsionit në Kadastër. Njëra është korrupsioni i vogël endemik. Dhe tjetri është ai i madh, merrja Lenës dhe jepja Prenës. Ky është ai korrupsioni i madh që ka ndryshuar në themel sistemin. Kjo nuk ndodh më për shkak të dixhitalizimit. Sot që regjistrat janë dixhitalë nuk bën asnjë veprim se lë gjurmë”, tha Lame.
Lame e ka forcuar argumentin e tij duke treguar se punonjësit e Kadastrës kanë kërkuar rritje rrogash dhe kjo vërteton se niveli i korrupsionit ka rënë.
“Vetë ritmi i punës nëpërmjet sistemit nuk të lë kohë për ta thirrur, për ti thënë hajde te kafja, për ti thënë të shkojmë atje, të takohemi, mesazhi e gjithë të tjerat. Vec rritmi i punës nëpërmjet sistemit e përmirëson gjënë. Ajo që i vë kapakun dhe që e kam vënë re këto ditë te fundit dhe që ma kujtoi Blendi Gonxhe me thënë të drejtën me të cilin ka 22 vite që nuk na ndan fati, herë bashkohemi, herë ndahemi, por jemi gjithmonë në krah të njeri tjetrit, është fakti që në Kadastër kanë kërkuar rritje rroge, shenja më e sigurtë e uljes së korrupsionit. Në qoftë se për doganierët dhe punonjësit e Hipotekës dikur thuhej “po pse ka edhe rrogë”, fakti që tani po bëjnë presion për rritje rroge tregon që është ulur shumë indeksi i korrupsionit”, u shpreh Lame. g.v/abcnews.al
