Kuzhinierja nga Uganda Dorcus Mirembe, e njohur gjerësisht si Mama D, sot ka vendosur Rekord Botëror Guinness duke e tejkaluar atë të një irlandezi me gatim për mbi 120 orë.
Ajo filloi rrugëtimin e saj të gatimit më 23 dhjetor dhe po përpiqet të vazhdojë deri më 31 dhjetor.
Rekordin individual për gatimin më të gjatë e mbante kuzhinieri irlandez Alan Fisher, i cili e vendosi atë në Japoni në fillim të këtij viti për gatim nga 28 shtatori deri më 3 tetor.
Koha aktuale e gatimit të Mama D deri më tani është mbi 123 orë.
Ugandas të shumtë janë dyndur në lokalin e saj të gatimit për të ofruar të gjitha format e mbështetjes, nga financiare deri në morale.
Zyrtarë qeveritarë, njerëz të biznesit dhe të famshëm kanë shprehur mbështetje për të duke dërguar mesazhe përmes platformave të ndryshme të mediave sociale, ndërsa shumë të tjerë e kanë vizituar fizikisht në restorantin e saj pranë Kampalas.
Kompani të ndryshme ushqimore i kanë siguruar asaj me bujari furnizime gatimi dhe sende të tjera thelbësore.
Ajo tha për Anadolu se gjatë sfidës së saj, ajo po gatuan ushqime nga e gjithë Uganda dhe po i ofron të gjitha ushqimet e gatuara falas.
“I gjithë ushqimi është falas… janë njerëz të tillë që na japin forcë të ecim para. Gjithçka që nevojitet është të kesh oreks, kjo është e gjitha. Kush ha, më inkurajon”, tha ajo.
Ajo shpjegoi se ishte frymëzuar për të marrë përsipër sfidën për shkak të shumëllojshmërisë së ushqimeve të disponueshme në vend.
“Uganda është e pajisur me një bollëk ushqimesh tradicionale dhe unë dua t’i prezantoj ato në botë, të jem ambasadore për kuzhinat e mrekullueshme të larmishme të Ugandës, perlës së Afrikës”, shtoi ajo.
Njohja zyrtare është në pritje të shpalljes nga ana e gjyqtarëve të Rekordeve Botërore Guinness.
