Kryeministri i Kosovës Albin Kurti dhe presidenti i Serbisë, Aleksandër Vuçiç pritet të nënshkruajnë deklaratën për personat e pagjetur gjatë luftës se fundit në Kosovë, me 3 maj në Bruksel. Në takimin e radhës ndërmjet tyre do të diskutohet edhe për mekanizmin për vetëmenaxhim të komunitetit serb në Kosovë.
Deputetja e Lëvizjes Vetëvendosje, njëherësh kryetare e Komisionit parlamentar për Punë të Jashtme dhe Diasporë, Arbëreshë Kryeziu-Hyseni thotë për KosovaPress se mekanizmi për vetëmenaxhim është ndryshe prej Asociacionit dhe ka kompetenca të tjera prej tij.
Por, në anën tjetër, shefi i grupit parlamentar të AAK-së, Besnik Tahiri, thotë për KosovaPress se marrëveshja Kosovë-Serbi nuk duhet të reduktohet vetëm në Asociacion.
Ai shton se në takimin e nivelit të lartë me 3 maj duhet të diskutohet për zbatimin e të gjitha pikave të marrëveshjes bazë dhe jo vetëm për Asociacionin.
KosovaPress ka pyetur edhe në Qeverinë e Kosovës për të konfirmuar agjendën zyrtare të takimit Kurti-Vuçiq, mirëpo të njëjtit nuk kanë kthyer përgjigje.
Takimi më 3 maj është i pari ndërmjet Kurtit dhe Vuçiq, që nga dakordimi në Ohër më 18 mars për aneksin e zbatimit të marrëveshjes bazë Kosovë-Serbi.
Ndërkaq, dy kryenegociatorët e dialgout, Bislimi dhe Petkoviq janë takuar me 4 prill, ku është thënë se ka pasur pajtim për tekstin e deklaratës për personat e pagjetur./abcnews.al
