Irani njoftoi sot sanksione të reja kundër Bashkimit Evropian dhe nëntë individëve dhe subjekteve të Mbretërisë së Bashkuar në përgjigje të sanksioneve të vendosura nga BE dhe Britania të hënën.
Teherani i akuzon këta persona dhe entitete për “mbështetje të terrorizmit dhe organizatave terroriste (…), inkurajim të dhunës kundër popullit iranian ose “përhapje të informacionit të rremë për Iranin”, shpjegoi Ministria e Jashtme iraniane.
Irani paralajmëroi të martën se do të hakmerrej në përgjigje të sanksioneve të reja të vendosura një ditë më parë në Bruksel dhe Londër, më shumë se katër muaj pas trazirave të shkaktuara nga vdekja e Mahsha Amini.
Ministrat e jashtëm të BE-së shtuan 37 individë ose entitete iraniane në listën e tyre të sanksioneve për shkelje të të drejtave të njeriut. Britanikët shtuan pesë persona dhe dy subjekte në listën e tyre.
Lista e re e sanksioneve iraniane përfshin tetë francezë, duke përfshirë kryebashkiakun socialist të Parisit Anne Hidalgo, filozofin Bernard-Henri Lévy dhe ish-deputetin Gilbert Mitterrand, djalin e ish-presidentit francez Francois Mitterrand.
Objektivat e sanksioneve janë edhe tre drejtues të Charlie Hebdo , revistës që tashmë ishte përfshirë si subjekt në listën e mëparshme të sanksioneve. Revista satirike në fillim të janarit kishte zemëruar Teheranin duke publikuar karikaturat e liderit suprem të Iranit, Ali Khamenei.
Radio J me bazë në Francë dhe Miqtë Evropianë të Izraelit (EFI) janë ndër tre entitetet e shënjestruara.
Lista përfshin gjithashtu emrat e gjashtë eurodeputetëve, dy ish-deputetëve, si dhe suedezit të ekstremit të djathtë Rasmus Paludan, i cili të shtunën dogji një kopje të Kuranit në Suedi, duke shkaktuar protesta të gjalla në Ankara dhe kryeqytete të botës myslimane./abcnews.al/
