Ministri i Jashtëm ukrainas Dmytro Kuleba tha sot se industria e mbrojtjes e vendeve perëndimore nuk është në gjendje të prodhojë sasi të mjaftueshme të municioneve artilerie që i nevojiten Kievit, duke shtuar se Koreja e Veriut është një partner më efektiv për Rusinë sesa Perëndimi për Ukrainën.
“Të gjithë ushtarët dhe oficerët deklarojnë se Rusia është superiore në sasinë e municioneve që ka në dispozicion, ndër të tjera, sepse merr ndihmë nga Koreja e Veriut.
Sado qesharake të duket, Koreja e Veriut duket të jetë një partner më efektiv për Rusinë sesa miqtë tanë që na furnizojnë me municione.
Kjo është qesharake. Dhe duhet të ndryshojë”, tha Kuleba në një intervistë për “Welt” gjermane.
Ai deklaroi se BE-ja, NATO-ja dhe qeveritë individuale janë pro rritjes së prodhimit të armëve, por, sipas tij, kur duhet të merren vendime konkrete, vendet perëndimore “po mbyten në diskutime të pafundme”.
/abcnews.al
