Nga Edi Oga
Gjithnjë e më tepër shqetësim, ndjek çdo “përballje” të kryeministrit tonë me Fevziun tonë, në “Opinion”. Nuk dyshoj aspak në dy dëshirat dhe qëllimet e Fevziut në lidhje me këtë duel, triumfin në debat dhe audiencën e lartë.
Të dytën Fevziu e arrin gjithnjë, të parën asnjëherë. Edi Rama gjithnjë e mund Fevziun në debat. Siç mund këdo tjetër. Sepse Edi Rama është ai që është dhe moderatorët tanë janë ata që janë.
Le të ushqejmë logjikën e thjeshtë.
A do të shkonte Edi Rama në një studio ku moderatori do ta mundte? Ku pas “përplasjes” do të humbte pikë besimi dhe pëlqyeshmërie në publik? Jo.
Ata tashmë e njohin mirë njëri-tjetrin dhe e dinë që pa filluar, rezultatin final të përplasjes së tyre “titanike”!
Sado “underdog” në këtë duel, Fevziu është maksimumi i forcës gazetareske që një moderator shqiptar mund të ushtrojë mbi Ramën, le të themi është si një “rrip i kaftë” në karate, por fituesi është gjithnjë ai, “rripi i zi”, kryeministri.
Vështirë se ka njeri në glob që të zotërojë teknikat e komunikimit dhe të politikës së “post-truth”-it si i pari i vendit tonë! /abcnews.al
