Studiuesi Redi Shehu ishte i ftuar këtë të martë në emisionin “Provokacija”. Ai foli përballë gazetarit Mustafa Nano për një rithemelim të sistemit. Sipas tij kjo gjë është e arritshme nga populli shqiptar, pasi mund të dalin njerëz të cilët mund të fillojnë rithemelimin.
Mustafa Nano: Ti nuk do çuditeshe që nesër të merrje vesh që një grup njerëzish kanë krijuar atë bërthamën e parë.
Redi Shehu: Unë them që mund të ndodhë. Unë jam me tezën që shqiptarët nuk janë një popull i ndryshëm nga popujt e tjerë, nuk jemi një popull i dënuar që të mos e meritojmë demokracinë. Ne si popull kemi shumë cilësi të mira se popujt e tjerë, të cilët sot kanë një nivel më të lartë. Ne vetëm kemi pasur një fatkeqësi historike që na detyroi të jemi shumë hapa mbrapa. Duke qenë se ne gëzojmë të njëjtët veti, ne jemi një popull që nuk e duam padrejtësinë, nuk e duam në vetvete korrupsionin, pavarësisht se mund të korruptohemi lehtë. Por cili popull ka qenë i gatshëm për demokraci? Asnjë popull nuk ka qenë i gatshëm për demokraci. Popujt janë entitete të cilat edukohen përmes strukturave dhe përmes proceseve dhe unë them që nuk dallojmë shumë nga ata. Pra ne mund ta bëjmë. Tek ne mund të dalin njerëz të tillë që mund ta fillojnë rithemelimin.
Për sa i përket vendimit të opozitës për djegien e mandatit, Shehu tha se ata janë penduar. Sipas tij, opozita është e dënuar të shkojë në marrëveshje, çka bie në kundërshtim me tezën e rithemelimit. Kjo pasi nëse arrihet një marrëveshje nuk do të kemi rithemelim, por riciklim.
“Unë besoj se janë penduar. Edhe këto sinjale për diskutime edhe njëherë me Kryeministrin, unë besoj se janë të dënuar që të shkojnë në marrëveshje. Ajo që themi në në tezën e rithemelimit është që nuk duhet të kemi marrëveshje. Sepse nëse kemi marrëveshje, kemi edhe 30 vjet të tjera të njëjtët njerëz. Procesi duhet të rifillojë, dikush duhet të largohet, disa duhet të largohen, ndryshe nuk ka rithemelim, ka riciklim të këtyre njerëzve. Unë jam që nuk duhet t’i riqarkullojmë më këta njerëz. Kanë pasur kontributet e tyre në 30 vjet, kanë pasur të metat e tyre, tani është boll”, tha Shehu.
