Me kohën nuk mund të luftosh dot, po ashtu, as me kundërshtarin kur ai është shumë më i fortë se ty.
Cristiano Ronaldo është një moment tjetër kritik të karrierës, ndoshta në të fundit fare, pasi skuadra e tij, Al-Nassr, pësoi disfatë të rëndë në finalen e Superkupës së Arabisë Saudite.
Kampionia e vendit, Al-Hilal, tregoi sërish dominimin me suksesin 4-1, ndërsa Cristiano Ronaldo pati një shpërthim tipik të tijin pas pësimit të golit të katërt.
Edhe pse futbolli është lojë skuadre, dhe humbjet e fitoret ndahen bashkë, sërish “superylli” portugez iu përveç shokëve me gjeste duke i akuzuar se po flinin gjumë, dhe se nuk po jepnin aq sa duhet.
Kjo padyshim që ka sjellë qejfmbetje në dhomën e zhveshjes, ndërsa disa prej yjeve tek Al-Nassr, nuk janë në nivelin e pritur.
Të tillë si Sadio Mane apo Aymeric Laporte pritet të largohen e klubi saudit nuk po mundet të bindë emra të tjerë të mëdhenj që t’i zëvendësojnë.
Fitorja e trofeve duket thuajse e pamundur, pasi vjet Al-Hilal fitoi kampionatin dhe Kupën, pavarësisht se rrugëtimi në Champions League-n aziatiek ishte një dështim.
Liga Profesioniste saudite ende nuk ka filluar, por ajo që ndodhi në finalen e Superkupës e tregon shumë qartë gjendjen e Al-Nassr dhe të Cristiano Ronaldo.
Mirëpo, nuk mbaron me kaq, pasi klubi po kalon një krizë financiare, pasi pronarët nuk do të shpenzojnë ashtu si më parë, ndonëse rroga e “yllit” luzitan, më e larta në botë dhe në histori, prej 200 milionë eurosh në vit nuk është në rrezik. /i.m /abcnews.al
