Jo vetëm Marash Kumbulla. Një tjetër zbulim i këtij sezoni në Serie A është edhe Amir Rrahmani. Mbrojtësi dardan la Dinamo Zagreb në verë dhe u transferua te Verona. Paraqitjet e 25-vjeçarit kanë qenë shumë të mira dhe bashkë me Kumbullën kanë formuar një “digë” në mbrojtjen e ekipit italian.
Kapiteni i Kosovës numëron 1159 minuta aktivizim në kampionat dhe ka marrë vetëm një karton të verdhë. Calciomercato.com e krahason me Skriniar të Interit në aspektin fizik dhe personalitetin që shfaq në fushë. Napoli e pëlqen shumë, ka marrë informacion te klubi veronez dhe është gati të nisë negociatat për shqiptarin.
Verona ka deklaruar se nuk do të shesë asnjë lojtar në janar dhe gjithçka po përflitet për sezonin e ardhshëm. Rrahmanit i mbetet të vazhdojë punën e të dhurojë paraqitje pozitive, teksa vera mund të sjellë transferimin te ekipi i famshëm italian. /abcnews.al
