Prej disa muajsh tashmë është duke u zhvilluar procesi i ankandit të shitjes së Vllaznisë, që është ndeshur me shumë ankesa dhe probleme gjatë rrugës, por më në fund po shkon drejt mbylljes me sukses dhe regjistrimit të një momenti historik për klubin shkodran.
Bashkia e Shkodrës bën me dije se asnjëra nga ankesat e ofertuesve nuk është marrë në konsideratë nga Komisioni i Prokurimit Publik dhe ky i fundit e ka sjellë vendimin zyrtar të njohjes së të gjithë procesit të deritanishëm.
Në këto kushte, mund të themi se sponsori aktual, Alban Xhaferi do të jetë pronari i ri i Vllaznisë, pasi të gjitha ofertat më të larta se të tijat janë skualifikuar për pakorrektësi në plotësimin e dokumentacioneve dhe deklarimeve të tjera.
POSTIMI I BASHKOSË SHKODËR – Komisioni i Prokurimit Publik – KPP ka sjellë zyrtarisht në Bashkinë e Shkodrës përgjigjen përfundimtare për procesin e ankandit të KF Vllaznia sh.a.
KPP ka lënë në fuqi vendimin e Autoritetit Shitës – Bashkia e Shkodrës, duke çertifikuar të gjitha etapat e procedurës së ndjekur për ankandin e KF Vllaznia sh.a.
Që në ditën e parë të shpalljes, ka qenë një proces ligjor, transparent dhe në komunikim me publikun. Janë respektuar me rigorozitet ligjet dhe aktet e tjera ligjore që rregullojnë procedurat e ankandit në Shqipëri.
Tashmë, pas vendimit të KPP, ankandi i KF Vllaznia sh.a. po shkon drejt përmbylljes, duke shënuar privatizimin e parë në Shqipëri për një klub futbolli.
Jemi krenarë që Vllaznia jonë është përsëri e para edhe në ketë procedurë. Falenderojmë të gjithë pjesëmarrësit që kanë treguar interes për një emër të madh siç është Vllaznia jonë.
Klubi kuqeblu përgatitet të nisë një fazë të re të aktivitetit, duke u administruar ashtu si të gjitha klubet e tjera të suksesshme në vend e botë. Siç kemi konfirmuar edhe më herët, si një emblemë identifikuese e Shkodrës, shkodranëve e mijëra tifozëve, Bashkia Shkodër do të vazhdojë të kontribuojë për Vllazninë e futbollit siç edhe për të gjitha sportet.
Në fund, një falenderim për tifozët e mrekullueshëm kuqeblu, të të gjitha kohërave, kudo ku ndodhen. Mbështetja e tyre edhe gjatë procesit të ankandit, është një vlerë shtuar e qendrueshme për Vllazninë dhe sukseset e saj. /abcnews.al
