Një konflikt për pronën dyshohet të jetë bërë shkak për masakrën me tre të vrarë në fshatin Xibër të Klosit. Sali Dakuçi ka qëlluar për vdekje vëllain e tij të vogël dhe nipin, më pas vrau edhe veten.
Për një copë tokë në fshatin Xibër të Klosit u bë një masakër me tre të vrarë. Në fillim nisi konflikti mes dy vëllezërve Sali Dakuçi dhe Kujtim Dakuçi.
Më pas vëllai i madh qëlloi me armë zjarri të voglin. Ky i fundit nuk mundi t’i mbijetojë plagëve duke mos mbërritur gjallë në spitalin e Burrelit. Në sherr ndërhyri nipi Flogert Dakuçi i cili u plagos rëndë nga xhaxhai i tij. I riu ndërroi jetë rrugës për në spital.
Mësohet se autori është kthyer në banesë pas krimit të dyfishtë dhe aty i ka dhënë fund jetës. Tragjedia brenda familjes ndodhi mesditën e së martës.
Policia po heton për rrethanat dhe motivet e ngjarjes. Dyshohet se shkak për masakrën është bërë një pronë. Madje për këtë arsye vëllezërit nuk flisnin prej kohësh me njëri-tjetrin./ABC News Albania 24/7
