Presidenti i Kolumbisë, Gustavo Petro, ka njoftuar të mërkurën se qeveria e tij do t’i ndërpresë marrëdhëniet diplomatike me Izraelin që nga e enjtja, për shkak të eskalimit të tensioneve ndërmjet shteteve, lidhur me luftën Izrael-Hamas.
“Nesër marrëdhëniet diplomatike me shtetin e Izraelit do të ndërpriten…për shkak të pasjes së një presidenti gjenocidal”, ka thënë Petro gjatë një marshi për Ditën Ndërkombëtare të Punës, në kryeqytetin kolumbian.
“Nëse Palestina vdes, vdes humaniteti, dhe ne nuk do ta lejojmë atë që të vdesë”, ka shtuar ai. Ministri i Jashtëm izraelit, Israel Katz i ka qortuar komentet e Petros, në platformën X.
“Historia do të kujtojë se Gustavo Petro vendosi të qëndrojë me përbindëshat më të neveritshëm të njohur për njerëzimin, të cilët dogjën foshnjat, vranë fëmijë, përdhunuan gra dhe rrëmbyen civilë të pafajshëm,” ka shkruar Katz. Disa javë pas sulmit të 7 tetorit të kryer nga Hamasi në jug të Izraelit, që shkaktoi luftën në Gaza, dhe gjatë të cilit mbetën të vdekur rreth 1,200 persona, Petro ka tërhequr ambasadorin e saj në Izrael.
