Gulnara Karimova, e bija e ish-diktatorit të Uzbekistanit Islam Karimov, po ndiqet penalisht nga autoritetet zvicerane si koka e një organizate kriminale ndërkombëtare që “pastroi” qindra milionë dollarë.
Sipas Financial Times, Karimova, e njohur edhe me pseudonimin “Princesha e Uzbekistanit “, akuzohet për vjedhjen e qindra milionëve nga vendi i saj dhe ryshfet ndaj drejtuesve të biznesit dhe zyrtarëve qeveritarë në mbarë botën.
Akuzat e reja ndaj 51-vjeçares, e cila ndodhet në burg në Uzbekistan që nga viti 2019, u ngritën dje të enjten nga autoritetet zvicerane.
Në veçanti, Karimova akuzohet për drejtimin e një “sindikate kriminale” që përdorte kompani të ndryshme dhe llogari bankare me bazë në Zvicër për të pastruar para.
Sipas Times, organizata kriminale e drejtuar nga ish-diplomati i OKB-së quhej “Byroja” dhe përfshinte më shumë se 100 kompani legjitime që punonin në fshehtësi për të fshehur paratë e vjedhura dhe për t’i bërë anëtarët e saj më të pasur.
Karimova gëzoi imunitet diplomatik për vite të tëra dhe udhëtoi nëpër botë, duke shfaqur stilin e jetës së saj luksoze dhe marrëdhënie me të famshëm. Fokusi i organizatës kriminale, e cila filloi të funksionojë në 2005 thuhet se ka qenë një kompani zvicerane e quajtur Zeromax, e cila u mbyll në vitin 2010.
Karimova, e cila më parë ka punuar si stiliste mode, thuhet se ka përdorur kasaforta në bankën private zvicerane Lombard Odier për të fshehur diamante dhe gurë të tjerë të çmuar me vlerë miliona.
Përveç kësaj, më shumë se 400 milionë franga (rreth 440 milionë dollarë) janë ende “të ngrira” në llogaritë në emër të Karimova në bankë, raportoi Times. Banka po hetohet në lidhje me pasuritë e 51-vjeçares për transaksione të parregullta financiare dhe pastrim parash.
Siç thekson Neë York Post, Karimova i ka mohuar akuzat e saj. Avokati i saj me bazë në Gjenevë, Grégoire Manzat, tha se ish-gruaja laike ishte e gatshme “të luftonte për të treguar pafajsinë e saj”.
Autoritetet zvicerane nisën një hetim ndaj Karimovës pas vdekjes së babait të saj në vitin 2016, kur gruaja humbi imunitetin e saj diplomatik. Karimova u vendos në arrest shtëpiak në vitin 2013 pasi situata politike në vendin e Azisë Qendrore ndryshoi dhe u dënua në vitin 2017 për përvetësim.
Që atëherë, avokatët e saj pretendojnë se ajo është torturuar dhe i mohuar të drejtat e saj themelore.
/abcnews.al
