Ish-shefi i Shërbimit Informativ Fatos Klosi nuk e përjashton mundësinë që edhe ai mund të ftohet për t’u pyetur nga gjykata speciale në Hagë.
Ish-Kreu i Shërbimit Informativ Kombëtar, Fatos Klosi në intervistën ekskluzive dhënë për emisionin “Ballkan” të gazetares Linda Karadaku deklaroi se nëse thirret nga Gjykata Speciale e Hagës është i gatshëm te shkojë, edhe pse thotë se nuk ka asgjë për të cilën i duhet të mbrohet.
I pyetur për kampet apo ambientet për të cilat është aluduar se kanë funksionuar në territorin shqiptar si vende në të cilat keqtrajtoheshin persona të ndryshëm, Klosi u shpreh se nuk ka patur asnjë informacion të tillë dhe vështirë të kenë ekzistuar ato asokohe.
Sipas tij nuk mund të quhen kampe disa dhoma që ndoshta mund të jenë përdorur për të marrë në pyetje dikë që mund të ishte i dyshuar.
“Janë ftuar në Hagë si të më ftonin dhe mua, me pretendimin se unë di ca gjëra, më shumë se të tjerë, mund të më ftonin edhe mua dhe të më pyesnin”, thotë Klosi.
Linda Karadaku: Mendoni që mund t’iu ftojnë?
Fatos Klosi: Nuk e di, është punë e tyre.
Linda Karadaku: Nëse do të ndodhte?
Fatos Klosi: Do të veja natyrisht.
Linda Karadaku: Po çfarë do thoshit?
Fatos Klosi: Varet nga pyetjet e tyre. Unë nuk do thosha asgjë për veten time, po…nuk ka ndonjë gjë për tu mbrojtur. Unë do të shoh rezultatin në fund dhe nuk do të jetë asgjë. Struktura e Speciales e bëri detyrën e vet, ata kujtojnë se i trembën këta drejtuesit e UÇK-së.
N.D./abcnews.al
