Grupi i ekspertëve të Këshillit të Europës (GRETA) ka publikuar raportin e tretë për trafikun e qenieve njerëzore në Shqipëri.
Në këtë raport mirëpriten ndryshime në legjislacionin e vendit për të forcuar të drejtat dhe pozicionin e viktimave për planin kombëtar 2018-2020, por kërkohen më shumë përpjekje për mbrojtjen, ri-integrimin e viktimave, si dhe kompensimin e viktimave.
Raporti njeh faktin, që viktimat e trafikimit kanë të drejtë të përfitojnë nga ndihma juridike falas pavarësisht të ardhurave të tyre. Por sipas raportit, autoritetet shqiptare duhet të ofrojnë ndihmën e një mbrojtësi dhe këshilltari ligjor për këto viktima si dhe ndihmë juridike falas në një fazë të mëparshme.
GRETA shpreh shqetësimin, se ka pasur vetëm një vendim penal për kompensimin e një viktimë të trafikimit dhe se viktimat nuk kanë akses ende në një skemë kompensimi shtetëror.
Ndaj në raport vlerësohet, se nevojiten masa për të lehtësuar dhe garantuar aksesin e viktimave të trafikimit në kompensim, duke siguruar që mbledhja e provave mbi dëmin e pësuar nga viktima të jetë një pjesë integrale e hetimit, duke shfrytëzuar gjithashtu edhe legjislacioni për ngrirjen dhe konfiskimin e pasurive.
GRETA mirëpret ekzistencën e një njësie të specializuar policore përgjegjëse për hetimin e rasteve të këtij trafiku, por mbetet e shqetësuar për numrin e ulët të dënimeve.
Në raport u bëhet thirrje autoriteteve të ndërmarrin hapa të mëtejshëm për të siguruar që rastet e trafikut të qenieve njerëzore të hetohen në mënyrë proaktive, duke përdorur teknika speciale të hetimit dhe duke kryer hetime financiare për mbledhjen e provave.
Autoritetet duhet të sigurojnë trajnim për prokurorët dhe gjykatësit dhe t’i inkurajojnë ata të specializohen në çështjet e trafikimit, duke siguruar që të vendosen sanksione efektive dhe proporcionale. /abcnews.al/
