Kampionati i futbollit në Greqi ka rinisur dhe ndeshjet po zhvillohen me dyer të mbyllura. Klubet kanë nevojë për mbështetjen e tifozëve dhe i kanë dërguar një kërkesë qeverisë që të lejohet prania e tyre në stadium.
Dëshira e tyre dhe e vetë tifozëve, është refuzuar nga autoritetet greke. Ndeshjet “play-off” dhe “play-out”, do të vazhdojnë të luhen pa praninë e publikut.
L’Equipe raportoi javën e kaluar se klubet e Super League shpresonin që të lejoheshin 20% e kapaciteteve të stadiumeve. Qeveria ka vënë veton dhe diçka e tillë nuk do të ndodhë.
Shteti fqinj numëron 190 persona të vdekur nga koronavirusi dhe mbi 3300 të infektuar. Rastet janë shtuar shumë dy javët e fundit dhe kjo ka detyruar autoritetet që të mos nxitohen për rikthimin e tifozëve në stadiume. /abcnews.al
