Eksperti për çështjet e integrimit, Gledis Gjipali komentoi gjithashtu edhe kërcënimin e Greqisë se do të bllokojë rrugën evropiane të Shqipërisë nëse nuk zgjidhet çështja e Fredi Belerit. Në intervistën për “Tirana Live”, eksperti theksoi se përfundimi i gjyqit ndaj Belerit rrëzon edhe bllokimin e Greqisë.
“Për fat të keq, është e lidhur me bllokimin që Greqia i ka bërë Shqipërisë për Belerin dhe e vetmja mënyrë për zgjidhjen e këtij bllokimi shoh përfundimin e çështjes gjyqësore me çështjen Beleri. Me përfundimin e saj, do të bjerë edhe arsyeja për vendosjen e vetos. Por kjo ngelet në dorën e vendit që vendos veton.
Jo gjithmonë arsyet janë mjaftueshëm të forta për ta arsyetuar por vendimmarrja ngelet. Është vetë traktati i BE që e mundëson që secili vend mund të bllokojë procesin e votimit. Prandaj është një element që shpresoj se do të zgjidhet shpejt për shkak se çështja aktuale është e përkohshme, por në nivel politik, marrëdhëniet e acaruara krijojnë premisa për bllokime të ardhshme.”, u shpreh ai./abcnews.al
