Kosovë- Katër persona kanë vdekur si pasojë e të shtënave me armë zjarri në tri raste të ndodhura në tri ditët e fundit në Kosovë.
Lidhur me sigurinë në vend ka folur edhe kryetari i Aleancës për Ardhmërinë e Kosovës (AAK), Ramush Haradinaj. Ai ka deklaruar se dora e shtetit duhet të ndihet në sigurinë e rendit.
Nëpërmjet një statusi në Facebook, Haradinaj shkruan se ngjarjet kriminale janë shqetësuese, ndërsa kërkon edhe një reflektim nga institucionet kryesore të shtetit.
“Kjo sjellje në masë është reflektim i institucioneve kryesore të shtetit, të cilët të parët nuk respektojnë rend, ligj e prokurori, duke i ‘trimëruar’ kriminelët të të gjitha natyrave përmes amnistimit të sjelljes kriminale të shefit të shtetit. Ky është efekti zinxhiror i sjelljes banditeske nga i pari; Kosovën po e kthen në një shtet ku jeta dhe mirëqenia e qytetarëve janë jashtë kontrollit”, ka thënë kreu i AAK-së.
Sipas Haradinajt, siguria e qytetarëve duhet të jetë prioritet parësor.
/abcnews.al/
