Eksperti për sigurinë dhe kriminalistikën Ervin Karamuço, ka folur sërish për ngjarjen e bujshme të dy ditëve më parë në Uzinën e Përpunimit të Armëve në Gramsh, ku dy shtetas rusë dhe një ukrainas tentuan të hynin fshehurazi, por u pikasën nga ushtarakët shqiptarë.
Pavarësisht tymnajës nëse janë ose jo agjentë rusë, profesor Karamuço ka zbuluar disa detaje mjaft interesante, të cilat lidhen me një prej personave të kapur në Uzinën e Gramshit, bëhet fjalë për 32-vjeçaren Svetlana Timofoeva (Lana).
Në shkrimin e tij Karamuço thekson se deri tani janë shkëmbyer me dhjetëra e-maile si dhe po planifikohen disa takime diplomatike të cilat kanë si qëllim lirimin e asetit të Vladimir Putin.
Sipas Karamuços pala ruse po bën të pamundurën të lirojë Lanën, edhe pse negociatat me një vend anëtar të NATO-s janë thuajse të pamundura.
Ndërkohë Karamuço thekson se institucionet shqiptare kanë rritur masat e sigurisë për të mbrojtur “agjentët” e kapur, pasi mund të ketë edhe ndonjë operacion nga ana e njësisë 29155 GRU për eliminimin fizik të tyre, ndërsa nënvizon se nuk duhet harruar ngjarja e Qerretit, ku 4 shtetas rusë humbën jetën në mënyrë të mistershme.
Shkrimi i Karamuços:
Përmenda dje si metaforë dhimbjet e kokës së Kremlinit, por pak kush e kuptoi. Kur ata i konsiderojnë asete ndërhyjnë menjëherë për ti liruar. Dhe në fakt me gjasa ajo po ndodh. Me dhjetra emaile po shkëmbehen dhe disa takime diplomatike po planifikohen, me synimin për të liruar Lanën. Por me një shtet të NATOS do e kenë pothuajse të pamundur. Gjithsesi, Gledisi vajti dje urgjentisht në Elbasan dhe rriti masat e sigurisë në qytet, se ekziston edhe rreziku i ndonjë operacioni nga njësia 29155 e GRU për ti liruar me pahir ose për ti eleminuar. Disa prej tyre vërtiten lirisht në Mal të Zi dhe nuk e kanë të vështirë të penetrojnë në territorin tonë. Kanë tentuar ta bëjnë në 2 raste në Poloni dhe një rast në Lituani. Historia e Qerretit është një ngjarje nga e cila duhet të nxjerrim të gjithë mësime. Çdo opsion është i mundshëm. Nisur nga këto analiza, për arsye sigurie “Pakot” po mendohet të sillen në Tiranë, ku i presin për hetime të mëtejshme” ustallarët”. Megjithatë, një problem i madh që duhet zgjidhur në këtë vend janë mendjet e skeptikëve dhe gjumashëve të palexuar. Nëse thellohesh në qindra libra dhe informacione publike ndriçohesh më shumë të kuptosh kërcënimet reale të sigurisë kombëtare. Thashethemet e kafeneve dhe sinmdroma kombëtare ” ti sdi gjë kur as unë nuk e di” po na dëmtojnë shumë.
Le të presim përfundimin e hetimeve. Deri atëherë të mundohemi të lexojmë sa më shumë për të kuptuar nga po na vjen e keqja më e madhe……
P.S ..Në pushim të leximit ngrini kokën nga qielli për të shplodhur sytë, sepse një B52 po ju përshëndet …
/Abcnews.al/
