Maqedonia e Veriut do i rikthehet sërish qendrave të votimit të dielën e 5 Majit, në kuadër të balotazhit për zgjedhjet presidenciale në vend. Të dy kandidatët tashmë kërkojnë votat e shqiptarëve. Këta të fundit në raundin e parë të zgjedhjeve votuan për kandidatin e pavarur Blerim Reka.
Nga Aleanca për Shqiptarët, parti kjo që mbështeti Blerim Rekën në rrethin e parë zgjedhor, thonë se ende nuk kanë vendosur se cili do të jetë hapi i tyre i ardhshëm rreth balotazhit të 5 Majit.
Flakron Bexheti: Ajo që dihet është se 80 mijë votat e Blerim Rekës janë pronë e qytetarëve shqiptarë që kanë qenë të destinuara kundër kandidatit të shtetit, por edhe atij tjetër, po kanë qenë pro një kandidati shqiptar.
Partia Demokratike Shqiptare ka dhënë dhe do të vazhdojë të japë maksimumin e vet në mbështetje të kandidaturës së Stevo Pendarovskit.
Azem Sadiku: Vota e shqiptarëve në Maqedoni ka 290 mijë, ajo pjesa e 220 mijëshit ka qenë pro NATO-s dhe Unionit Europian.
Ndërkaq, Kryeministri Zoran Zaev në takimin e parë pas rrethit të parë të zgjedhjeve, pranoi se e kanë kuptuar mesazhin e votuesve, duke premtuar se do të bëjnë “pastrim” të kuadrove joadekuate.
Zoran Zaev: Ka pakënaqësi nga funksionarët, nga pushteti qendror, nga pushteti shtetëror dhe ai lokal dhe këtë mesazh unë e mora i pari. Jo vetëm që e mora, por edhe ua kthej, sigurisht që do të ketë “pastrim”, sigurisht që do të pastrojmë.
Kandidatja e opozitës Gordana Siljanovska është prononcuar përmes rrjeteve sociale duke thënë se Maqedonia është e gatshme për një grua si president, gjë që në opinionin e këtushëm shihet si mesazh se ajo është e bindur në fitore në rrethin e dytë zgjedhor./abcnews.al
