Kancelari gjerman Olaf Scholz është kundër dërgimit të raketave ”Taurus” në Ukrainë për momentin, pavarësisht lutjeve të përsëritura nga liderët ukrainas për armët, konfirmuan burime qeveritare për dpa-në.
Burimet treguan se Scholz është i hapur për të rishikuar çështjen në një datë të mëvonshme, por, për momentin, nuk do të japë miratimin e tij për pajisjen e ukrainasve me raketat e prodhimit gjerman.
”Në vend të kësaj, Gjermania planifikon të vazhdojë të përqendrojë dërgesat e armëve në Ukrainë në sistemet e artilerisë dhe të mbrojtjes ajrore”, thanë burimet për dpa-në.
Gazeta ”Bild” raportoi të mërkurën se Gjermania kishte njoftuar tashmë Kievin për vendimin.
Britania e Madhe dhe Franca e kanë furnizuar tashmë Ukrainën me raketat e tyre me rreze dhe aftësi të ngjashme, ”Storm Shadow” dhe ”Scalp”.
Ukraina filloi t’i kërkojë publikisht Gjermanisë raketa ”Taurus” në maj, duke thënë se armët nevojiten për të goditur pozicionet ruse përtej rrezes së artilerisë tradicionale.
Por, distanca prej 500 kilometrash e raketave ”Taurus” shkaktoi shqetësime në Berlin, ku disa zyrtarë kanë frikë se Ukraina mund t’i përdorë raketat për të goditur objektivat në territorin rus.
Scholz ka shprehur vazhdimisht skepticizëm për sigurimin e Ukrainës me raketa ”Taurus”.
