Një jaht i lidhur me miliarderin rus, Roman Abramovich, u largua nga Mali i Zi më 14 mars, pas dy ditësh qëndrimi në Gjirin e Tivatit.
Sipas ueb-faqes që monitoron lëvizjen e anijeve “Marine Traffic”, jahti i Abramovichit “My Solar” po lundron drejt Stambollit duke kaluar fillimisht në Adriatik dhe Jon. Aktualisht, jahti ndodhet në ujërat e Jonit mes Greqisë dhe Italisë.
Jahti, në vlerë prej gati gjysmë miliardi eurosh, lundroi në Mal të Zi më 12 mars, pasi Mbretëria e Bashkuar vendosi t’iu ngrijë asetet disa oligarkëve rusë, që besohet se kanë lidhje me Kremlinin.
Perëndimi ka miratuar një varg sanksionesh të rënda kundër Rusisë, që kur kjo e fundit ka nisur pushtimin e Ukrainës, më 24 shkurt.
Në mesin e të sanksionuarve nga Mbretëria e Bashkuar është edhe Abramovich, njëherësh pronar i klubit të futbollit, Chelsea.
Emri i Abramovichit është gjetur edhe në listën e të sanksionuarve të rinj, që ka publikuar të martën Bashkimi Evropian.
Mali i Zi gjithashtu ka vendosur sanksione kundër Rusisë, për shkak të pushtimit të Ukrainës, dhe ka thënë se ndjek vendimet e politikës së jashtme të BE-së në këtë aspekt.
Ministria e Punëve të Jashtme e Malit të Zi ka thënë për mediat në Podgoricë se jahti “My Solar” nuk ka qenë i regjistruar zyrtarisht në emër të Abramovichit./REL
