Nesër shpallet klubi më i mirë në botë për vitin 2019. Liverpool dhe Flamengo do të përballen mes tyre në orën 18:30. Jorge Jesus pranon supremacinë e ekipit anglez dhe thur elozhe për Jurgen Klopp. Brazilianët fituan Kupën Libertadores dhe trajneri beson fort tek ekipi i tij, teksa tregon mënyrën se si mund të konkurrojnë kundër “The Reds”.
“Ne kemi lojtarë të mirë, ndërsa ata kanë më të mirët në botë. Kjo është diferenca mes ekipeve dhe duhet ta mbushim këtë boshllëk me taktikë. Liverpool ka lënë shenjë në futbollin botëror. Të dy ekipet po përpiqen për të rifituar prestigjin ndërkombëtar. Ky ishte një vit super për ne, fituam titullin dhe Kupën Libertadores.
Klopp po bën një punë spektakolare, e drejton skuadrën prej vitesh dhe ka arritur objektiva të mëdha. E di që është shumë e rëndësishme për ta të fitojnë titullin pas 30 viteve, por kjo finale nuk do të ndikojë në rrugëtimin e tyre. Liverpool është skuadra më e mirë europiane, tani i mbetet vetëm të bëhen skuadra më e mirë në botë”, thekson trajneri portugez i Flamengos. /abcnews.al
