Tenori i njohur, Kastriot Tusha ka zbuluar se jeta me muzikën është sa e bukur dhe e vështirë, pasi duhet të ndjekësh regjimin e një sportisti. Mirëpo, ai ka theksuar se gjithçka harrohet kur merr duartrokitjet e publikut.
“Është shumë e bukur jeta me muzikë, sepse bëhesh personazh publik, por dhe është e vështirë, sepse është një zanat që i përkushtohesh gjithë jetën, edhe sidomos këngëtarit që do një regjim si sportisti. Kështu që nuk është ndonjë privilegj shumë i madh. Unë e respektoj regjimin, për shembull, po kthem pas si solist i Teatrit të Operas, duhet t’i ruhesh kondicionerit, të ftohtave shumë, akullore etj, edhe të ngrohtave shumë. Duhet t’i ruhesh alkoolit, duhanit, si një sportist i mirëfilltë, por normalisht kjo harrohet kur merr duartrokitjet e publikut”, u shpreh ai.
Më tej, i ftuar në “Pas Mesnate”, Tusha ka treguar se si e zbuluan talentin e tij në muzikë, duke thënë se e gjithë familja kishte prirje. Ai zbuloi se mami i binte firzamonikës, babi këndonte shumë mirë, ndërsa vëllai kishte zërin më të bukur.
“Motra ka qenë iniciatore për të zbuluar talentin tim në muzikë. Ne në përgjithësi në familjen tonë të gjithë këndojmë, të gjithë kanë vesh muzike. Mamaja ka qenë shumë me vesh të mirë dhe në Pajë më tregonte që kur ka ardhur, sepse ka qene një gjendje të mirë te gjyshi dhe ne origjinën e kemi nga Kruja, edhe kur ka ardhur në Pajë ka pasur dhe violinë dhe firzamonik, i ka pasur rënë firzamonikës mamaja, si një amatore. Ndërsa, babai ka pasur zë shumë të mirë, në përgjithësi fis me vesh të mirë. Ndërsa, vëllai shyqyr që nuk vazhdoi për muzikë sepse do të na kalonte të gjithëve ne”, rrëfeu tenori./abcnews.al
