Një raport i Misionit të Kombeve të Bashkuara në Afganistan thotë se gratë në atë vend kanë frikë të largohen nga shtëpitë e tyre për shkak të dekreteve dhe fushatave të talebanëve në lidhje me veshjen dhe detyrimin për t’u shoqëruar nga kujdestarët meshkuj kur dalin nga shtëpitë e tyre.
Brenda pak ditësh duhet të ketë një takim në Katar të thirrur nga OKB-ja për bashkëpunimin e mundshëm me talebanët dhe krizat në Afganistan, përfshirë gjendjen e të drejtave të njeriut.
Në raportin e misionit të OKB-së thuhet se dekretet zbatohen me arrestim, ngacmim dhe frikësim. Më shumë se gjysma e grave të intervistuara për këtë raport ndihen të pasigurta, kur largohen nga shtëpia pa një kujdestar mashkull, i njohur si “mahrem”.
Femrat që kanë dalë me “mahrem” ndihen më të sigurta, por me stres të konsiderueshëm për shkak të varësisë nga një person tjetër që i shoqëron.
Gratë e intervistuara deklaruan se kanë gjithnjë e më shumë frikë të shkojnë në vende publike për shkak të kërcënimeve për arrestim dhe për shkak të “stigmës dhe turpit afatgjatë” që lidhet me marrjen në paraburgim nga policia.
Disa gra thanë se edhe të afërmit e tyre meshkuj kanë frikë të shkojnë me të afërmit e tyre sepse ekziston mundësia që edhe ata të ngacmohen nga talebanët.
Që nga marrja e pushtetit në vitin 2021, talebanët i kanë ndaluar gratë të marrin pjesë në shumicën e fushave të jetës publike dhe të marrin arsim përtej klasës së gjashtë, megjithëse fillimisht ata premtuan një rregull më të moderuar.
Në maj 2022, talebanët nxorën një dekret që urdhëronte gratë të mbanin “burka” nga koka te këmbët jashtë, të ngjashme me kufizimet gjatë sundimit të mëparshëm taleban të viteve 1996-2001./abcnews.al
