Betejë e ashpër duket se do të jetë deri në fund për ekipin që do të ngjitet në Superiore. Në grupin A kreun e ndajnë Erzeni dhe Korabi, ndërkohë që vetëm një pikë më pak kanë Kastrioti e Besëlidhja, që e kanë shpallur si objektiv rikthimin në elitë. Në fundjavë është programuar të luhet edhe java e gjashtë e kampionatit.
Një ndeshje është veçuar dhe ajo do të zhvillohet të dielën, prej orës 13:00. Besëlidhja-Shkumbini do të transmetohet në TV, pasi është vlerësuar si një nga takimet më të rëndësishme. Korabi ka një përballje të lehtë në letër, ndaj Dinamos së vendit të fundit. Dibranët synojnë fitoren, që të kryesojnë të vetëm.
Erzeni ka një ndeshje më të vështirë, ndaj Egnatias në transfertë dhe shanset janë të mëdha që shijakasit të ndalen. Skuadra nga Rrogozhina kërkon të bëjë autokritikë, pasi u mposht nga Veleçiku të shtunën. Takim tjetër i programuar në grupin A është ai mes Kastriotit dhe Burrelit, që drejtohet nga Alert Alvani. Ky i fundit i ka drejtuar më parë krutanët, të cilët synojnë rikthimin te fitorja këtë javë.
Kategoria e Parë – Java 6
E shtunë, më 26 tetor, ora 14:00
Kastrioti-Burreli
Veleçiku-Tërbuni
Korabi-Dinamo
Egnatia-Erzeni
E diel, më 27 tetor, ora 13:00
Besëlidhja-Shkumbini
Grupi B i luan të gjitha takimet të shtunën. Lushnja kryesuese do të luajë në transfertë me Elbasanin, që renditet në vendin e parafundit dhe që ka pësuar katër humbje në javët e para të kampionatit. Për verdhejeshilët fitorja është detyrim.
Pogradeci-Apolonia është një nga sfidat më interesante në këtë grup. Liqenorët në shtëpi janë një ekip i fortë, por fierakët kanë treguar se dinë të fitojnë edhe jashtë fushe. Devolli, që pësoi humbjen e parë javën e shkuar, pret Ilirinë e Fushë-Krujës. Skuadra nga Bilishti nuk po kalon një moment të mirë, pasi janë pezulluar 4 futbollistë.
Besa, që synon Superioren, do të duhet të marrë pikët e plota me Shënkollin e vendit të fundit. Ndeshje tjetër e këtij grupi është ajo mes Orikut dhe Turbinës, që pritet të jetë mjaft ë luftuar të shtunën.
GRUPI B
E shtunë, më 26 tetor, ora 14:00
Devolli-Iliria
Oriku-Turbina
Elbasani-Lushnja
Besa-Shënkolli
Pogradeci-Apolonia
/abcnews.al
