Dy punëtorë që kryenin punë pastrimi në një tubacion në centralin bërthamor të dëmtuar të Fukushima Daiichi u kontaminuan nga një rrjedhje uji radioaktiv dhe u shtruan në spital, njoftoi sot operatori TEPCO (Tokyo Electric Power Company).
Sipas informacioneve përkatëse, dy punonjësit (të moshës rreth 20 dhe 40 vjeç) janë dërguar në Spitalin Universitar të Fukushimës dhe qëndrojnë nën vëzhgimin mjekësor edhe pse nuk kanë shfaqur simptoma të rënda.
Aksidenti ndodhi të mërkurën kur punëtorët po kryenin punë pastrimi në një tubacion të Sistemit të Përparuar të Përpunimit të Lëngut (ALPS) që filtron ujin e përdorur për të ftohur karburantin e mbetur bërthamor në stacion.
Një tub u shkëput, duke shkaktuar që rreth 100 mililitra (ml) të lëngut radioaktiv të derdheshin, duke kontaminuar punonjësit, sipas deklaratës së kompanisë.
Njëri nga dy punëtorët u zbulua me 6.6 milisievert (mSv) rrezatim beta, mbi kufirin e përcaktuar të sigurisë prej 5 mSV. TEPCO thekson se dy punonjësit nuk mbanin mjetet mbrojtëse të papërshkueshme nga uji, të nevojshme për kryerjen e punimeve në stacion.
Ata iu nënshtruan një procesi dekontaminimi në ambientet e stacionit, por nivelet e rrezatimit nuk ranë ndjeshëm as gati nëntë orë pas aksidentit. Ata janë ridezinfektuar në spital, ku do të qëndrojnë nën vëzhgim mjekësor për të paktën dy javë, tha TEPCO.
