Izraeli njoftoi se ka vendosur zyrtarisht të mos bashkëpunojë me Gjykatën Ndërkombëtare Penale (GJNP) në lidhje me një hetim për krime të luftës në territoret e okupuara palestineze. Kryeprokurorja e GJNP-së, Fatou Bensouda, njoftoi më 3 mars, se ajo kishte hapur një hetim të plotë mbi situatën në territoret e pushtuara nga Izraeli.
Vendimi zemëroi Izraelin, i cili nuk është anëtar i gjykatës me bazë në Hagë.
Më 9 mars, GJNP-ja u ka dërguar një njoftim Izraelit dhe Autoritetit Palestinez se kanë një muaj kohë për të informuar gjykatësit, nëse po hetojnë krime të ngjashme, me ato që hetohen nga ana e GJNP-së.
Nëse Izraeli do ta informonte gjykatën se në fakt po kryente hetime për autorët e dyshuar të krimeve të luftës, atëherë do të kishte të drejt të kërkonte një shtyrje të hetimeve. Palestinezët e kanë mirëpritur hetimin dhe thanë se ata nuk do të kërkojnë ndonjë shtyrje.
Zyra e kryeministrit izraelit, Benjamin Netanyahu lëshoi një deklaratë duke thënë se qeveria kishte rënë dakord “të mos bashkëpunonte” me GJNP-në. Izraeli do t’i dërgojë një letër gjykatës, përmes së cilës “hedh poshtë plotësisht pretendimin se Izraeli kryen krime lufte”, tha qeveria izraelite.
Letra gjithashtu do të “përsërisë pozicionin e qartë të Izraelit se, gjykata e Hagës nuk ka autoritet të hapë një hetim kundër tij”.
“Izraeli është i përkushtuar ndaj shtetit të së drejtës dhe pret që gjykata të përmbahet nga shkelja e sovranitetit dhe autoritetit të tij”, thuhet në deklaratë.
Kryeprokurorja e GJNP-së, Fatou Bensouda ka thënë se hetimi i saj do të mbulojë situatën që nga viti 2014 në Rripin e Gazës, Bregun Perëndimor dhe Jeruzalemin lindor të aneksuar nga Izraeli.
Pas një hetimi paraprak pesë-vjeçar, Bensouda tha se kishte një “bazë të arsyeshme” për të besuar se krimet ishin kryer nga të dyja palët – nga ushtria izraelite dhe militantët islamikë të Hamasit, që e kanë kontrolluar Gazën që nga viti 2007, por dhe nga grupet e armatosura palestineze.
Netanyahu, një kritik i zëshëm i GJNP-së, akuzoi të enjten gjykatën për “hipokrizi” pasi po shënjestron e trupat izraelite të cilët “luftojnë me moral të lartë kundër terroristëve”. Kryeministri e ka kritikuar më parë vendimin për të hapur hetime, duke e quajtur si “thelbin e antisemitizmit”. Ai tha se Izraeli ishte “nën sulm”.
Shtetet e Bashkuara gjithashtu kanë kritikuar hetimin dhe kanë shprehur mbështetje për aleatin e tyre Izraelin. GJNP-ja javën e kaluar mirëpriti heqjen e sanksioneve ndaj kryeprokurores Bensouda nga ana e presidentit të SHBA-së, Joe Biden.
Sanksionet ishin vendosur nga ana e ish-presidentit, Donald Trump./REL
