Ish-sekretari britanik i mbrojtjes Ben Wallace tha se dërgimi i trupave britanike në Ukrainë “nuk mund të përjashtohet”. Sipas Wallace, nuk mund të përjashtohet që trupat britanike të dërgohen në Ukrainë për të luftuar kundër ushtrisë së presidentit rus Vladimir Putin.
“Duhet të përdorim shprehjen ‘nuk mund ta përjashtojmë’. Në fund të fundit, një pjesë e parandalimit është paqartësia për ta bërë armikun që të hamendësojë se deri ku do të shkojmë dhe çfarë do të bëjmë”, tha ish-ministri.
Sipas tij, Putin po e përdor me mjeshtëri këtë strategji.
“Dhe unë mendoj se gjëja më e mirë është të sigurohemi që ai të kuptojë se ne i marrim veprimet e tij në Ukrainë shumë seriozisht”, tha ai.
Ai bëri thirrje gjithashtu për një rritje të nivelit minimal të shpenzimeve të mbrojtjes të Britanisë në 3%. Sipas tij, shuma e shpenzimeve nuk duhet të përcaktohet nëse e lejojnë kushtet ekonomike, që është politikë e kryeministrit dhe e qeverisë, por kur ka rrezik.
“Është ajo që përcakton sa shpenzojmë, jo kushtet ekonomike. Ky është kërcënimi dhe duhet të bëjmë diçka për të mbrojtur veten”, theksoi ish-ministri.
Rikujtojmë se ish-kryeministri dhe ministri aktual i Jashtëm i Britanisë, David Cameron, ka kundërshtuar hapur dërgimin e forcave britanike në Ukrainë, qoftë edhe për misione stërvitore.
/abcnews.al
