Drejtësia iraniane ekzekutoi këtë të shtunë një burrë të shpallur fajtor për bashkëpunim me agjencinë e inteligjencës izraelite, Mossad, njoftoi agjencia e lajmeve Mizan.
“Dënimi me vdekje u zbatua mëngjesin e sotëm (të shtunë) në burgun e Zahedanit, kryeqyteti i provincës Sistan-Baluchistan, kundër spiunit të regjimit sionist”, raporton Mizan Online, pa përmendur emrin e të dënuarit.
Drejtësia iraniane e akuzoi njeriun për “bashkëpunim në fushën e inteligjencës dhe spiunazh në dobi” të Izraelit, “mbledhje të informacionit të klasifikuar” dhe “propagandë në dobi të grupeve dhe organizatave kundër Republikës Islamike të Iranit”.
“Ky person ka komunikuar me agjenci të huaja, duke përfshirë Mossad-in, ka mbledhur informacione të klasifikuara dhe me pjesëmarrjen e bashkëpunëtorëve ka ofruar dokumente për agjencitë e huaja, duke përfshirë edhe Mossad-in”, raportoi gjithashtu më herët agjencia zyrtare e lajmeve iraniane IRNA, gjithashtu pa përmendur emrin e atij personi.
Sipas IRNA-së, ky person i kishte dorëzuar informacione të klasifikuara një “oficeri të Mosadit” me qëllim “propagandën në dobi të grupeve dhe organizatave kundërshtare të Republikës Islamike”. Agjencia nuk ka specifikuar se kur është dorëzuar informacioni.
Gjithashtu nuk dihet se kur është arrestuar ky person. Megjithatë, IRNA sqaroi se një apel që ishte paraqitur ishte refuzuar.
Ekzekutimi në burgun në Zahedan, provincën Sistan-Baluchistan, erdhi një ditë pasi militantët Baloch sulmuan një stacion policie në provincë, duke vrarë gjashtë personel sigurie dhe duke plagosur disa të tjerë.
Sipas televizionit shtetëror, këtë të shtunë u mbajt një funeral publik për viktimat e sulmit në qytetin Rusk, ku ndodhi sulmi. Dy militantë të Jaish al-Adl u vranë gjithashtu në përleshjet që pasuan sulmin./abcnews.al
