Interi fitoi duelin me Milanin dhe e meritoi fitoren. Gjithsesi, ia doli vetëm në sekondat e fundit, falë golit të kapitenit Mauro Ikardi.
Ishte një derbi, por i takoi plotësisht vetëm njërës skuadër.
Interi dominoi përballjen me Milanin në stadiumin “San Siro” të Milanos, dhe meritoi të fitonte, ndonëse këtë e arriti vetëm në fund.
Në një sfidë që pritej më e ekuilibruar, zikaltërit ishin ata që luajtën më mirë, që krijuan raste dhe që nuk patën fat disa herë.
U duk qartë se e kishin përballuar më mirë trysninë e një dueli të tillë, ndër më të mëdhenjtë në botë.
Formacioni i trajnerit Luçiano Spaleti tregoi sërish se këtë vit do të jetë një pretendent për titull në Serinë A, ndërsa tashmë e ka lënë pas nisjen e keqe të sezonit.
Milani i Gatuzos, në të kundërt, ishte një zhgënjim.
Pavarësisht se këtë vit po luan më mirë sesa në të kaluarën, sërish i mungoi pjekuria dhe karakteri I duhur për nivele të tilla.
Thuajse nuk gjuajti asnjë herë në portën kundërshtare, diçka që rrallë mund të ketë ndodhur vitet e kaluara në ndeshjet derbi.
Gjithsesi, mund të kishte marrë barazimin, por në minutën e 92-të, portieri Donaruma gaboi, duke I dhënë mundësi kapitenit të Interit, Mauro Ikardi, që të shënonte golin e fitores.
Pas këtij suksesi, Interi u ngjit në vend të tretë në Serinë A me 19 pikë, 6 pikë prapa Juventusit kryesues.
Milani mbeti prapa, në nivelin e 13 pikëve. /abcnews.al
