Qytetarët shqiptarë po preferojnë gjithmonë e më tepër pensionet private. Të dhënat e Autoritetit të Mbikqyrjes Financiare tregojnë se gjatë periudhës janar-shtator të këtij viti janë regjistruar në këtë skemë mbi 38 mijë anëtarë. Numri i anëtarëve është zgjeruar me mbi 4% ose 1483 anëtarë që nga fillimi i vitit. Në vlerë skema e pensioneve private ka kapur një vlerë prej 6.48 miliardë lekësh ose 60.80 milionë euro. Nëse e krahasojmë me një vit më parë vërehet një rritje me rreth 26% e vlerës së aseteve të pensioneve private. Por pavarësisht kësaj tendence pjesëmarrja e qytetarëve shqiptarë në skemën e pensioneve private vlerësohet ende e ulet. Aktualisht në këtë skemë janë më pak se 3% e forcave të punës. Nëse pensionet private do të ishin më të zhvilluara kjo do të lehtësonte barrën e skemës publike. Për të nxitur këtë skemë Autoriteti i Mbikqyrjes Financiare ka ndërmarr disa ndryshime ligjore që synojnë nxitjen e kësaj skemë, ndërhyrjet synojnë të ulin tarifat në rastet kur fondi tërhiqet me këste.
Skema e pensioneve private mbetet ende e panjohur për popullsinë e gjerë por ajo ofron një mundësi për rritje reale të pensioneve, nga pikëpamja e të ardhurave. Nëse një person ka mbyllur para në skemën private të pensioneve paratë e investuara nuk humbasin, ato trashëgohen nga pasardhësit, ndryshe nga pensioni shtetëror që pushon së ekzistuari me humbjen e jetës së pensionistit. Pensionet private janë një skemë sociale që operojnë në Shqipëri prej 17 vitesh dhe në vend ekzistojnë 4 fonde pensionesh private.
PERSONA NE SKEMEN E PENSIONEVE PRIVATE
Viti 2022 36.5 mije
Janar-shtator 2023 38 mije/abcnews.al
