Vetëm 24-vjeç dhe mund të quhet me plot gojë, “diamanti” i prapavijës së Inter. Me performancat, sigurinë dhe ndërhyrjet e tij kritike, qendërmbrojtësi italian, Alessandro Bastoni konsiderohet si një prej shtyllave të skuadrës “zikaltër”.
Për këtë arsye, bordi i Inter ka nisur negociatat me lojtarin dhe përfaqësuesit e tij, për rinovimin e kontratës së 24-vjeçarit, me “zikaltërit” që kërkojnë ta “blindojnë” për një kohë të gjatë talentin e mbrojtjes.
Inter ka vendosur t’i “shpërblejë” performancat e Bastoni, me një kontratë të vlefshme deri në vitin 2028, nga e cila do të përfitojë 5 milionë euro në sezon, pa llogaritur këtu bonuset në rast triumfesh.
Mbi rinovimin e lojtari, një koment të shkurtër e bëri dhe agjenti i mbrojtësit, Tullio Tinti, teksa tha se gjithçka është në fazën përfundimtare dhe në ditët në vijim pritet të mbyllet gjithçka për kontratën e re.
“Rinovimi i Bastoni? Jemi në fazën përfundimtare, në ditët në vijim do të gjejmë një mënyrë për t’i bërë gjërat siç duhet. Jemi në rrugën e duhur”,- u shpreh agjenti i mbrojtësit, teksa largohej nga zyrat e “zikaltërve”. /i.m /abcnews.al
