Timo Werner është një nga futbollistët më të fortë gjermanë dhe sivjet ka shkëlqyer me Leipzig. Sulmuesi ndodhej në shifrën e 27 golave sezonalë përpara ndërprerjes së kompeticioneve sportive dhe do të tentojë përmirësimin e rekordit të tij kur situata të qetësohet.
Sezonin e ardhshëm do e shohim në një skuadër më të madhe se Leipzig. Ofertat për goleadorin e kombëtares gjermane janë të shumta. Në Premier League e duan Liverpool dhe Chelsea, në Serie A përflitet për një interesim të Milanit, teksa nuk duhet harruar Bayern Munchen, që është gati t’i plotësojë çdo dëshirë.
Gjithsesi, karriera e Werner pritet të vazhdojë në ishull. Bleacher Report jep një indicie që të shtyn të besosh se lojtari do të kalojë në Angli. Ai ka filluar të marrë leksione të gjuhës angleze dhe ka nisur një kurs për këtë gjë. Werner e ka shprehur gjithmonë simpatinë për Jurgen Klopp, trajnerin gjerman që drejton Liverpool dhe transferimi në “Anfield” mbetet një mundësi konkrete. /abcnews.al
