Gjatë qëndrimit në Shkup, ku po merr pjese në Samitin e Liderëve të Procesit të Brdo-Brijunit, Presidenti shqiptar, Ilir Meta zhvilloi një takim të veçantë me Presidentin e Këshillit Europian, Donald Tusk.
Presidenti Meta e konsideroi shumë të rëndësishme pjesëmarrjen e Presidentit Tusk në këtë samit, shenjë e vëmendjes dhe mbështetjes gjithnjë e në rritje të BE-së ndaj Ballkanit Perëndimor.
Kreu i Shtetit gjithashtu vlerësoi vizitën dhe mesazhet inkurajuese që Presidenti Tusk përcolli gjatë vizitës së tij në Tiranë. Ato, sipas presidentit, duhet të nxitin të gjitha institucionet shqiptare drejt arritjeve konkrete në zbatim të 5 prioriteteve kyçe.
Presidenti Ilir Meta theksoi rëndësinë që ka edhe vendimi për liberalizimin sa më të shpejtë të vizave me Kosovën, një hap i merituar, sipas tij, që do të mundësojë lëvizjen e lirë të qytetarëve kosovarë drejt hapësirës Shengen.
