Loading ...
Në vitin 2013 mori një nga vendimet më të vështira të jetës. La Shqipërinë, profesionin si anesteziste dhe u nis drejt një të panjohure, duke mbajtur mbi supe përgjegjësinë më të madhe: të ishte një nënë e vetme për djalin e saj të vogël.
Sot, më shumë se një dekadë më vonë, rrugëtimi i Dr. Flutura Hasa Harold është shndërruar në një histori suksesi që kalon kufijtë e Shqipërisë. Djali i saj është 27 vjeç dhe ka përfunduar studimet për Financë në Kanada, ndërsa ajo është kthyer në një nga emrat e njohur të mjekësisë funksionale, terapisë hormonale dhe jetëgjatësisë, duke trajnuar edhe mjekë të tjerë në nivel ndërkombëtar.
Pas largimit nga Shqipëria, Dubai i hapi një kapitull të ri profesional. Pikërisht aty njohu edhe bashkëshortin e saj, një skocez, ish-president i një kompanie farmaceutike ndërkombëtare. Ata u martuan në Tiranë dhe ndërtuan një jetë të bazuar mbi të njëjtat parime që promovojnë edhe tek pacientët: aktivitet fizik, ushqyerje të shëndetshme, ekuilibër hormonal dhe kujdes të vazhdueshëm për organizmin.
Në vitin 2020, familja u transferua në Shtetet e Bashkuara, duke kaluar një periudhë edhe në Panama gjatë pandemisë së COVID-19. Sot ajo vazhdon të punojë si eksperte e mjekësisë funksionale dhe jetëgjatësisë, me një mision të qartë: të mos trajtojë vetëm simptomat, por të zbulojë shkaqet që i krijojnë ato.
E njohur nga pacientët si “doktoresha e hormoneve”, Dr. Hasa Harold shpjegon se plakja nuk është thjesht kalimi i viteve, por një proces biologjik që mund të ndikohet nga mënyra si jetojmë.
Sipas saj, hormonet nuk kontrollojnë vetëm sistemin riprodhues, por janë dirigjentët e metabolizmit, sistemit imunitar, funksionit të trurit, zemrës dhe rigjenerimit të qelizave. Me kalimin e moshës, rënia e estrogjenit, progesteronit, testosteronit, DHEA-së dhe hormonit të rritjes shoqërohet me inflamacion kronik, stres oksidativ, rezistencë ndaj insulinës dhe plakje më të shpejtë biologjike.
Ajo thekson se optimizimi hormonal nuk është një luks apo trend, por një pjesë e rëndësishme e mjekësisë moderne parandaluese, që synon jo vetëm zgjatjen e jetës, por shtimin e viteve të jetuara me shëndet dhe energji.
“Nuk mjafton të jetojmë më gjatë. Duhet të jetojmë më mirë”, është filozofia që udhëheq punën e saj.
Për Dr. Hasa Harold, mjekësia konvencionale dhe ajo funksionale nuk janë rivale. Përkundrazi, ato plotësojnë njëra-tjetrën. Mjekësia klasike është e pazëvendësueshme në trajtimin e sëmundjeve akute dhe emergjencave, ndërsa mjekësia funksionale kërkon të kuptojë pse organizmi është sëmurë dhe si mund të rikthehet ekuilibri.
Një pjesë e rëndësishme e filozofisë së saj lidhet edhe me integrimin e njohurive tradicionale me shkencën moderne. Pas studimeve dhe eksperiencës në vende si Shqipëria, Spanja, Belgjika, India dhe SHBA-ja, ajo beson se praktika si Ayurveda kanë sjellë prej shekujsh koncepte që sot mbështeten edhe nga kërkimet shkencore: rëndësinë e gjumit, ritmit cirkadian, ushqyerjes, aktivitetit fizik dhe menaxhimit të stresit.
Mesazhi i saj është i qartë: lodhja kronike, shtimi në peshë, pagjumësia apo ndryshimet hormonale nuk duhen pranuar si “normale” vetëm sepse kalojnë vitet. Në shumë raste, ato kanë shkaqe që mund të identifikohen dhe trajtohen.
Për këtë arsye, ajo i fton njerëzit të jenë më kërkues ndaj kujdesit që marrin, të informohen për formimin e mjekut që zgjedhin dhe të investojnë në kontrolle parandaluese, analizat e nevojshme, aktivitetin fizik, ushqimin cilësor dhe gjumin.
Sepse, siç thotë edhe vetë Dr. Flutura Hasa Harold, jetëgjatësia nuk është një destinacion. Është një praktikë e përditshme. Dhe qëllimi nuk është thjesht të shtojmë vite në jetë, por jetë në vitet tona.
