Çimi Brahimi, 53-vjeç nga Gjirokastra është arrestuar nga policia greke pasi ishte shpallur në kërkim për trafik të lëndëve narkotike dhe është ekstraduar drejt vendit tonë. Në lidhje me këtë vepër penale, Gjykata e Shkallës së Parë e Krimeve të Rënda Tiranë, i ka caktuar masën e sigurisë “Arrest në Burg”. Tashmë materialet hetimore i kanë kaluar Prokurorisë pranë Gjykatës së Shkallës së Parë Vlorë.
“Ekstradohet nga Greqia, një shtetas i shpallur në kërkim ndërkombëtar për trafikim të lëndëve narkotike. Nga ZQK Interpol Tirana është ekstraduar nga Greqia drejt vendit tonë, shtetasi shqiptar Ç. B., 53 vjeç, banues në Gjirokastër.
Ky shtetas ishte shpallur në kërkim në bazë të vendimit të Gjykatës së Krimeve të Rënda Tiranë, e cila në vitin 2017 i ka caktuar masën e sigurisë “Arrest në burg” për veprën penale “Trafikimi i lëndëve narkotike”. Ky shtetas, në bashkëpunim me shtetas të tjerë, bënte furnizimin me lëndë narkotike në Lazarat, me qëllim trafikimi drejt Italisë.
Në kuadër të bashkëpunimit dhe shkëmbimit të informacionit janë marrë informacione nga Interpol Athina, se ky shtetas po vuante dënimin në një burg në Greqi, për veprën penale “Trafikimi i lëndëve narkotike”, caktuar nga Gjykata e Janinës, me vendimin e datës 14.09.2018. Në përfundim të vuajtjes së dënimit u bë arrestimi provizor i shtetasit Ç. B., me qëllim ekstradimi drejt vendit tonë. Si rezultat i bashkëpunimit të Interpol Tiranës me Interpol Athinën u bë i mundur ekstradimi i tij nga Greqia drejt vendit tonë”, njofton policia. /abcnews.al
