Loading ...
Parlamenti i Hungarisë zgjodhi sot ish-kryetarin e Gjykatës Supreme, Andras Baka, në postin e presidentit të vendit, në një zhvillim të rëndësishëm politik pas ndryshimit të qeverisë dhe largimit nga pushteti të ish-kryeministrit Viktor Orban.
Baka u zgjodh në një votim të fshehtë me 140 vota pro dhe gjashtë kundër, ndërsa deputetët e partisë së djathtë ”Fidesz”, të drejtuar nga Orban, bojkotuan procesin e votimit.
Presidenti i zgjedhur pritet të bëjë betimin më 19 gusht.
Në Hungari, posti i presidentit është kryesisht ceremonial, por kreu i shtetit ka kompetencën të rikthejë ligjet në Parlament për rishqyrtim ose t’ia dërgojë ato Gjykatës Kushtetuese.
Pas zgjedhjes së tij, Baka tha se ndryshimet politike në vend nuk duhet të shndërrohen në një proces hakmarrjeje ndaj kundërshtarëve politikë.
Qeveria e kryeministrit Peter Magyar ka argumentuar se largimi dhe hetimi i disa zyrtarëve të emëruar gjatë qeverisjes së Orbanit është i nevojshëm për rikthimin e standardeve demokratike dhe forcimin e integritetit institucional.
Duke iu referuar periudhës 16-vjeçare të qeverisjes së Orbanit, Baka kritikoi performancën e katër qeverive të tij dhe e cilësoi polarizimin e thellë politik e shoqëror si një nga sfidat kryesore me të cilat përballet Hungaria.
Megjithatë, ai theksoi se abuzimet e mundshme ligjore dhe financiare të së kaluarës duhet të hetohen dhe, kur është e nevojshme, të ndiqen penalisht, ndërsa institucionet demokratike duhet të rikthehen.
”Ky vend nuk mund të ndërtojë një të ardhme të përbashkët ndërsa qytetarët e tij e shohin njëri-tjetrin si armiq”, deklaroi Baka pas zgjedhjes.
Ai shtoi se ndryshimi politik nuk duhet të nënkuptojë që qytetarët të kenë frikë, të heshtin apo të ndihen të huaj në vendin e tyre.
