Roma u shemb në Genoa dhe pas humbjes së thellë 4-1, skuadra kryeqytetase po lëpin plagët e marra. Pesë pikë në gjashtë ditë, 11 gola të pësuar, këto janë shifrat më goditëse për skuadrën e Mourinho, ku në fund të sfidës komentoi humbjen.
“Nuk kam shumë për të thënë pas një ndeshjeje si kjo. Nuk fola me lojtarët, thjesht u përshëndeta, nuk dua ta analizoj shumë ndeshjen.
E nisëm keq duke pësuar gol, por patëm një reagim. Menjëherë pas barazimit, patëm dëmtimin e Llorentes që ndryshoi strukturën e skuadrës. Më pas Mancini u ndëshkua me karton të verdhë dhe ne preferuam të ndryshonim formacionin. Çdo goditje që pësuam ishte gol.
Ne kishim lojtarë të dëmtuar, Genoa kishte më shumë ditë për të rikuperuar veten dhe për ta përgatitur këtë ndeshje. Ky është grupi që kemi dhe me këta djem, me pikat e forta dhe të dobëta, ne duhet të dalim nga kjo situatë. Nuk ka kohë për të ndjerë keqardhje për veten, edhe nëse padyshim që jemi shumë keq nga brenda. Ndeshja tjetër është shumë e rëndësishme për ne,” është shprehur Mourinho./h.ll/abcnews.al
